星期四, 3月 04, 2010

中女與因果

首先,申報利益,我今年29歲,中女一名。

我冇車冇樓冇錢冇事業冇家底冇學識冇老公冇靚樣,有份工有freelance有屋企有班fd有個竇有人追,thatz all。

昨夜,因為身邊有朋友看完了星期二檔案的《中女告白》,情緒很低落,總之覺得自己是多餘的是等死的,而我決定寫篇blog為一眾女兒家打打氣。

但其實,我是到了今天晚上才看這節目,還以為好大件事一味煽情拋出一大堆數字加real case講僧多粥少中女死梗ga啦。

節目完結,我的感想是 —— 原‧來‧咁‧咋?

嚇得我丫。

被訪者又不是never been kissed before那些,只是因為不同原因現正單身啫。

分手、離婚、第三者、被背叛這件事其實天天都發生,阿媽嗰代都一樣,不過從前通訊科技沒現在發達,分了手要寫封家書讓人知道,不比現在於facebook/twitter update一句就三姑六婆皆知。

一街都是男人,問題是有幾多是心頭好呢?但女人卻往往將心頭好與將來掛鉤。

除非你肯定日後要當一個母親但科技做不到單性繁殖否則你的將來關男人鬼事咩?

與其坐困愁城,為甚麼不走出去談談情跳跳舞,先開心一場?

20出頭的,你認定他們未玩夠不會settle down,我只知道,他們可以三天不睡陪你瘋狂戀愛加做愛。

50出頭的,你又嫌棄他們一隻腳伸入棺材,我只知道,他們的成熟世故讓你感覺安全窩心。

將來的事,誰知道?

可能20歲的就是愛定你一個敗犬女王,可能50歲的,opps… … 你身染惡疾早死過佢。

題外話。

今天,因為《中女告白》,我分別在醫務所2次,茶餐廳1次,地鐵1次及美容院1次聽到人們討論「中女」這個大課題。

其中,有兩次,兩位中女OL類物體認為她們現正單身的原因是 ——宜家d男人唔夠主動

如果你們認為這樣的因果合理… …

因:宜家d男人唔夠主動
果:你地嫁唔出 / 冇拖拍 / 冇人要


那麼,請問為甚麼男人要主動呢?or為甚麼男人要對你們主動呢?

你地有寶呀?

每天都有妹妹仔慶祝16歲生日,你們不是以為日日吃junk food吞下防腐劑就能青春常駐,然後單憑那張臉千秋萬世迷倒天下男人呀嘛?

我真心希望,你們永遠認為這樣的因果合理,然後眼看你們口中的「妖精」、「姣西」、「送上門唔知醜」女人一個一個得到幸福美滿的愛,你們繼續嘴藐藐詛咒人「睇你好得幾耐」。

好過,總勝過你們好都未好過。

當人家跟較自己年輕的男生臉貼臉跳舞,享受同輩男人將手袋內的重物放進他背包的細心,細味成熟男人夾她一片魚面頰肉的滋味,繼續留喺屋企煲劇啦你地。

就是你們聲大夾惡,令人退避三舍,讓靜靜守候愛情的那些女人,難覓知音。

我是真的生氣。

27 則留言:

  1. well said my dear.
    ladies who are so sad after watching the show - do have a thought about WHAT MAKES YOU SAD. stop blaming on guys, but think of WHAT YOU CAN DO BETTER. cheers!
    v

    回覆刪除
  2. 大仙,

    1,咁似我果篇?英雄所見略同

    2,合理!

    3,最奇既係:本來你係打氣,但最後變左生氣!本來你係講解,最後變左q##︿%&$…

    其實,同樣道理- 有d野,江山易改,本性難移!要怨要艾,點都係會繼續。一句:性格決定命運,最好不過!

    古月不死狐

    回覆刪除
  3. 好認同你講法~~
    KKAREY~

    回覆刪除
  4. 好耐未見過你咁好火

    bravo!!!

    回覆刪除
  5. 還可以, 呢個結構性問題好大因數係供求關系, 中國幾億美女, 有d有人仲要扮上菜早抖啦 -_-

    回覆刪除
  6. 真係姿色改變命運~
    當妳冇能力讓男人衝動, 男人又何來主動呢?

    靚, 就幾多歲去到邊都搵到食;
    唔靚? 唔緊要, 扣少粒鈕一樣得~

    回覆刪除
  7. 果兩位貌似OL既中女講,「依家d男人唔夠主動...」

    正確既講法其實應該係...

    依家d男人對你唔夠主動...

    佢地對住一d值得佢地主動既,自然就會好主動...

    回覆刪除
  8. 想幸福快樂就要自已爭取先得架... 越要覺得自已係寶, 只會繼續發霉.

    回覆刪除
  9. 非常認同! 總是有一些人把問題統統歸究於別人, 而忘記反省自己的問題.

    回覆刪除
  10. 所以我好喜歡臨尾地產經紀姐姐O個句:
    以前諗點樣令人比幸福自己
    宜家只希望令未來的老公變成世上最幸福的男人

    唔要求人地,要求自己,呢D,咪叫型lor!

    回覆刪除
  11. 從來都覺得幸福係自己主動搵返黎的,有事業,無男人都係個失敗的女人!連阿姐咁強o既女人都要結婚你就知咩事啦~女人

    回覆刪除
  12. 世事萬物都有因果! 幾年/十幾年前的港女所做的好事,今天吃自己的惡果!

    回覆刪除
  13. 男人係唔會珍惜做主動o既女人......

    回覆刪除
  14. 點解大部份女人無論點到最後都一定要有個老公先叫完滿先叫幸福? 一個人既生活都可以好幸福, 視乎你點樣去演繹.

    回覆刪除
  15. 我決定考完試後, 即刻寫番篇野(肯定link埋您呢篇啦)!

    回覆刪除
  16. 四眼妹一名,
    怕羞,
    少話,
    偏瘦,
    增肥唔成功,
    快將二十六歲個樣仲似個中學生,
    永遠人地鐘意咗第個時先發覺自己係鐘意佢的,
    有兩個好男仔同我表白過,但係我錯過咗,
    打算第時要買姑婆屋,
    雖然同自己講唔一定要有男朋友,
    但係大時大節或者見到一對對情侶時,
    會感到心情低落,想唔見人,想潛水,
    I am the one who's never been kissed before

    回覆刪除
  17. 「男人係唔會珍惜做主動o既女人」,呢句我好認同,主動唔一定係好,要睇情況。

    我始終覺得第一次約會要係男仔約先,打後女仔可以主動d。「主動」都分好多層次,為主動而主動就無謂啦,最緊要feel good去約個男仔,而個男仔都feel good去俾你約,總之2個人感覺舒服就得。

    簡單一句,「中女」唔需要多刻意去諗呢樣野,有d女人30幾歲都好受歡迎,只係同後生女既market唔同o者。學elaine講,開開心心去玩,諗咁多做乜?

    回覆刪除
  18. never been kissed before 既朋友們, 其實點指女仕, 有好多男仕都一樣係 中年 and never been kissed before. 我自己都識幾個.
    但係比d中女同呢d中佬相遇又會係點既結局呢!

    中女: 無目標囉, 唔可以依靠佢囉, 唔主動囉, 無品味囉, 悶囉, 唔細心囉 etc.

    中佬: 老囉, 唔靚囉, 有魚尾紋囉, 唔係我果type囉, 肥囉, 有bye bye 肉囉 etc.

    係我既經驗來講呢, 通常中女既comments 會比中佬既comments狠好多. 其實仲係單身既中年人都唔會將自己既要求 downgrade.
    邊個男人唔想自己條女青靚白淨身材好, 又識煮飯煲湯溫柔體貼丫. 又邊個女人唔想自己條佬細心專一唔會滾, 賺錢養家唔洗你做丫.
    而中女既問題大過中佬因為女多男少. 樓主講得好岩.. 真係 "係咁架咋". 跟本唔係d咩大問題.

    回覆刪除
  19. 昨夜,因為身邊有朋友看完了星期二檔案的《中女告白》,情緒很低落,總之覺得自己是多餘的是等死......
    ____________________




    去死囉,不過記得帶埋張損贈卡,死完報夢比俺囉。

    回覆刪除
  20. sawlee 如果叫你做鑽石王老女會唔會有d生機呢。唔駛種果種;

    回覆刪除
  21. "男人係唔會珍惜做主動o既女人“ 係咪常態我唔敢講,不過女追男從來不罕見。

    一個女人值唔值得一個男人珍惜,真係depends。更何況如今能夠歸類的人種繁多,個性和preference又各自矛盾,仲要係(=/>)兩個人既關係喎,真係人夾人。

    我都利益申報先,我是個28歲男,有追/被追的經驗。但目前仍然enjoy單身。

    > 那麼,請問為甚麼男人要主動呢?or為甚麼男人要對你
    > 們主動呢?
    >
    > 你地有寶呀?
    >
    > 每天都有妹妹仔慶祝16歲生日,你們不是以為日日吃
    > junk food吞下防腐劑就能青春常駐,然後單憑那張臉
    > 千秋萬世迷倒天下男人呀嘛?

    Elaine好波~!!!

    (想說,現在單憑外表真係好難exact7ly認得到眼前的女人的真實年齡,永遠都係心境+性格露出端偽。)

    回覆刪除
  22. 我同男朋友,今日3個月lu~

    人大了,便發覺怨天尤人只會令妳看不到別人的優點。自己曾經都同姊妹們誓神劈願話d男仔幾差,d女送上門幾cheap,到頭來我班姊妹還在咒罵,我就"好無骨氣地"同一個她們覺得not good enough的男仔一齊。但,我知道的是,i'm loved, they're not.

    what i mean is...姊妹們回頭是岸la, no one is perfect.妳揀人人揀妳je.

    回覆刪除
  23. 睇完節目,撫心自問,自己係男人會唔會追出鏡嗰幾個中女呢?
    結論係: 就算佢哋後生時都未必會令人好受落,唔關外貌,係全部(出鏡嗰十位八位),聽佢地講嘢,就知好醒目好能幹,性格好强,用喺工作係好,用喺男女關係上就唔係甘easy。
    遺憾地呢種能幹好强係會隨年紀而增加嘅。撞啱好强嘅男人咪無問題囉,但可惜香港正短缺呢類男人。

    回覆刪除
  24. 其實未婚亦唔需要感覺戚戚,結婚係人生的新開始,有可能比單身的時候還苦。
    婚得快可能分得仲快!

    回覆刪除
  25. 好認同妳最後這句"就是你們聲大夾惡,令人退避三舍,讓靜靜守候愛情的那些女人,難覓知音。"
    以前唔知係邊度看過一個研究報告, 說男人對女人的評分是由50分開始, 一點一點從對方的優點加分上去, 而女人對男人的評分則剛剛相反, 是從100分不斷減分的。
    所以, 請那些高談闊論的女士收細妳的聲音, 否則分都未加就減到唔合格, 是自招惡果。

    回覆刪除
  26. 好認同妳最後這句"就是你們聲大夾惡,令人退避三舍,讓靜靜守候愛情的那些女人,難覓知音。"
    以前唔知係邊度看過一個研究報告, 說男人對女人的評分是由50分開始, 一點一點從對方的優點加分上去, 而女人對男人的評分則剛剛相反, 是從100分不斷減分的。
    所以, 請那些高談闊論的女士收細妳的聲音, 否則分都未加就減到唔合格, 是自招惡果。

    回覆刪除
  27. 先來個報數,我是個30男,性格較怕羞,一生中叫做追過既女仔都係一個,仲要係失敗收場...
    「男人係唔會珍惜做主動o既女人」,呢句我不認同.
    當年,我識我現任女朋友時,有幸她的主動,不然我可能還是毒男一個.
    (註:對我主動過的女子不只一個,但我選了現在的女友)
    單是她的外貌,她絕不會令我主動結識她,但相識後,她的溫柔吸引著我,她與我有相同的興趣及價值觀,她其他優點等等...(下刪500字).自此,我每天的任務就是想法子令她開心,因為我見到她開心,我就好開心.所以我對我的女友好珍惜,我們一齊8年了.
    絕對認同妳果句"就是你們聲大夾惡,令人退避三舍"我識這類型的中女,真是2隻手的手指都數唔晒.
    另一個類型,就係不修蝙蝠型(同蝙蝠俠無關),我有時都會叫我班中女fd,汁汁個look,唔好成個師奶咁,佢地既回應
    就係: 睇樣既男仔都唔係好男仔la....唉..
    現實世界,白馬王子唔會係你煲劇既時候係隻窗口飛入黎的.現實就係現實,你一係靚,一係正都會有人黎識你,又唔靚又唔正,就要主動.如果唔係,你即使有幾好,有幾多內在美,跟本都無人知!

    回覆刪除