當我偶遇你

昨天流落冰天雪地，無光線沒有生機
當我偶遇人間一個你，才真正發覺熱愛滋味

你的手能令孤單遠離，還給我太多驚喜
於這浩瀚人海找到你，如昏暗世界，重見希冀

今天我決定，承諾將心給你
同行一生，同嚐歡欣，同心分享痛苦傷悲
今天以後，牽手走到白頭，窮這生全力愛你



Esther & David，祝你們幸福快樂 :)

是日金句

「先生請問想飲d咩呢？」

「有咩飲呀？」

「啤酒汽水果汁中國茶同紅白二事。」

「吓？？？？？？？？？」

「嗯................ sorry................係紅白酒。」

那天的Lunch Dating

在千呼萬喚之下，lunch dating當日的實況，終於寫下來了。

首先，請先閱讀今期的《新Monday》專欄 (冇買？咁唔捧場丫你)。

好啦，scan了給你看啦。

From for blog

本來，是有想過不在blog裡談及那天的lunch dating。

你們當我吊癮又好，扮害羞又好，但我畢竟不是生活在馬戲班，有些事，總想低調一點，不想聲張。

不想帶來壓力，也不想承受太多目光。

最害怕但又經常發生的事，就是被不相識的人認出來，然後問：「其實你寫稿收幾錢？/date過幾多個人？/幾時一齊去蒲？」

最近，多加一項，例必問：「你個lunch date咩人嚟ga？講多啲佢嘅嘢嚟聽啦。」

別人是位有血有肉生活在現實世界的男士，我怎樣也得替人家保留私隱吧。

不過，實在經不起讀者幾乎塞滿了我的email收件箱和facebook inbox，還是交代一下啦。

有許多女孩子如我，心思思想試LUNCH Actually的服務，但怕花了錢卻一個人也認識不到，我既然得到一次免費去lunch dating的機會，分享這次經驗讓大家多點了解也是好的。

整體來說，我對這次lunch dating的感覺絕對良好。

在的士上往餐廳的途中，其實是有二百個擔心的，不知道對方會否是個奇形怪狀的人，不知道會否沒話題dead air，不知道對方會否跟我談恒生指數成份股一周變動... ...

同時，又擔心別人看到我會否大失所望，如：以為空姐會好索 / 副業寫字應該有啲氣質etc，誰知有個未瞓醒的大嬸身穿九年前買下的舊冷衫和牛仔裙一屁股坐在他對面... ...

結果，第一眼看到對方，ok喎，簡直有點surprisingly good。

只是，腦海立即浮起一個問號 —— 佢要搵配對公司識女仔？唔係呀？？？

三小時午餐下來，一切正常，兩人天南地北甚麼也可以胡扯一通。

第二天，LUNCH Actually方面致電給我，問及那天lunch dating的feedback：

Restaurant
How would you rate the restaurant overall? (rating of 1 to 10, 10 being the highest). 8

First Impressions (Please comment on your date’s)
i. Consideration: Surprisingly Good

ii. Presentation: Surprisingly Good

iii. Confidence: Good

During the Date (Please comment on your date’s)
i. Interest Level: Good

ii. Conversation: Good

iii. Dining etiquette: Good

Goodbyes
i. Did you exchange contact details? Yes

ii. How long did the date last for? Did the date end positively? 3hrs / Yes


How would you rate your overall experience for this date?
(Below average: 1-5, Average: 6, Good: 7-8, Excellent: 9-10) 8


你們不用問可有下文/可有msn呀sms呀之類的問題，因為我死也不會答的了，哼哼 :)

請容我保留少少空間和私隱，好不好？乖啦。

我與你們都一樣，不過是個平凡女子，時常祈求上天跌一個對先生給自己。

然而，就算真的跌了一個下來，我們都要走過去，拾起來，然後好好努力維繫，對嗎？

用巧克力增加情趣

傳說中，巧克力有催情的作用(定係事實？)。

作為一個極度冷感的女人，收到別人送來一套巧克力味道的shower gel和body milk，用意為我增加情趣時，不是不感動的。

問題是，我自己同自己，左手幫右手增加情趣乎？

又，家裡用的是舊式熱水爐，只得六分鐘時間的熱水囉。

那瓶shower gel，味道香甜像奶昔，如果是男人替妳塗抹全身的話，應該有下文............... 現實是，我在生死時速得返兩分鐘熱水時間。

至於body milk，比較杰身要花點力氣推均，但真的全身上上下下都充滿巧克力味道，跳上床叫男人聞聞味道可好之後，應該有下文..................現實是，我自己一邊寫稿一邊聞。

後來打聽過資料和價錢，Sensation Chocolat原來是法國牌子，價錢不算便宜，shower gel $290，body milk $320，但情人節一可二鳥，用來當作禮物和「下文」，就非常超值。

From for blog

有男友/女友又有興趣的話，可到Senses Beaute一看，http://www.sensesbeaute.com/tc/

當然，你在街上遇到我，叫我伸出手臂讓你聞聞都ok的。

尋找一個 ______ 男友

心底裡，

我還是情願自己經濟獨立，

尋找一個能令我笑的男友就足夠。

My Dream Date with Elaine 之最後倒數

終於終於，等到My Dream Date Contest截止報名。

終於終於，等到Lunch Actually方面見過所有對我有興趣的男人。

終於終於，等到有了初步人選。

=====================================

Hi Elaine,

Here’s a quick update on some of the guys that I’ve met:

Profile - Mr. A

Late 20s, Banker

Born in HK, raised and studied in Australia for more than 10 years

Speak fluent English & Cantonese

He is outgoing, confident, with a good sense of humour, presentable.

Profile - Mr. B

Early 30s, Manager in Telco industry

Born in HK, studied and worked in Vancouver for more than 10 years

Speak fluent English & Cantonese

He is charismatic, gentleman, presentable, sociable, patience, a good speaker

I think the start of the new year brings you luck in love : )

=====================================

不知道名字，不知道樣貌。

我都是參加者，當然要遵守規則，最終人選由Lunch Actually方面決定。

終於終於，選定了人。

From for blog

終於終於，訂了日子見面。

就是2010年1月17日1pm。

你問我緊張嗎？那是一定的。

還得擔心那天會否賴床遲到，髮型聽不聽話，化妝是否得心應手。

然而，試一次lunch dating，跟一位陌生人吃個午餐之嘛，使死咩？

平常那些朋友介紹給你的「朋友的朋友」，週末那些在夜店請你喝酒的異性，其實，全都不過是陌生男人。

朋友不能保證那人不會辜負你，一杯酒那一百幾十元的慷慨更是雞毛蒜皮。

陽光有消毒殺菌的作用，在陽光下吃一頓飯，未必看得清對面的是否合適的人。

但至少，外出走走，哼著「我沒有溫柔，唯獨有這點英勇」，嘗試給自己一個機會。

我不相信，對先生會在我百無聊賴窩在沙發看《敗犬女王》時，按錯我家門鐘偶然遇上。

又一次修身

又又又開始減肥啦。

到底，要減幾多次肥先可以修成正果呢？

唔通，要減到死嗰日？

死咗之後，我嘅肉身經過火燒，會唔會有舍利子出現？

全部係生前食嘅減肥藥精鍊出嚟？

女仔要減肥，真係好麻煩。

跑步怕腳粗，游水怕變平胸，做gym又驚成個人橫咗。

諗來諗去，食藥做機好似好懶，但反而係最safe嘅。

減肥難，唔減咁又點呢？

我只係覺得，一個肥嘅女仔，佢條路，往往比其他女仔難行得多。

女仔一肥，就係「豬扒」。

即使你個樣其實幾靚，人聰明心地又好，放心，冇人會睇得到，你依然係一件「豬扒」。

上個禮拜，阿媽語重心長咁問我：「你就快三十歲啦，想玩到幾時呀？」

當然，佢指嘅係 —— 我幾時會選擇安定落嚟，結次婚生個孫俾佢玩。

但我諗起嘅係，就快三十歲啦，幾時可以100％修身成功，唔好再去到90％就停低，然後退步返去80％。

係時候將肥咗嘅幾磅肉減走，搵番嗰個好有毅力，減到日日胃抽筋都唔肯停嘅自己。

十個女仔，九個都話要減肥，為咗男人又好，為咗自己都好，建立一個目標，推動自己進步向前，始終係一件好事嚟嘅。

雖然，我阿媽仍然係未望到家鄉，未見到自己個女結婚生仔，冇法啦。

仍然感恩

一個不能喝酒純粹natural high的玩樂夜。

在MO bar，喝了一杯fruit punch。

在M1NT，喝了一杯diet coke、一杯coke及一樽VOSS water。

喝了甚麼不是重點，重點是我的錢包原封不動。

是的，我就是那種從來不太明白女人為甚麼要在酒吧自費買飲品的人。

千萬不要讓我明白，直到老死那天。

2006年10月26日寫下這句 ——

「可能我確是一個被香港男人寵壞了而不自知的女人。那麼，我只會為我的僥倖感恩。」

事隔數年，人面全非，但仍然感恩。

總是感恩。

一條廢柴的自白

正職：空姐

副業：寫字

每月休假日數：平均20日以上

慣常乘坐的交通工具：的士

性格：沉悶

智商：《宮心計》的對白很深奧

最大娛樂：放假

喜愛的運動：消化食物

精通的家務：令廚房失火

志願：希望食極唔肥

關於人生的迷思

經常問自己，

人生在世，

是否沒有較飽餐一頓更重要的事情呢？






















當明明派緊餐下一個就輪到你，

都咁唔撚等得狂拍我籮柚，

你老味係咪趕撚住去死呀？

要唔要送你一程呀仆街？

Lady First 專欄（70）－ 今年聖誕

今年嘅聖誕，你係點過嘅呢？

同朋友開house party，玩到整跌晒人哋棵聖誕樹上面嘅裝飾？

同情人二人世界煮飯仔整聖誕大餐？

去咗蒲，轉場又轉場，希望會遇上一個令你心動嘅人，下年有得收佢送俾你嘅聖誕禮物？

定係你同我一樣，預備好所有嘢，但最後邊度都冇去，坐喺屋企睇咗成晚電視，之後著到爛身爛世咁落街，食咗同聖誕完全無關嘅一餐？

平安夜，我食咗一碗$6嘅白粥。

呢個故事同所有故事一樣，俾咗一啲教訓我，就係——「期望越大，失望越大」。

其實，有好幾年嘅聖誕，都冇喺香港過啦。

記得舊年嘅聖誕，我喺歐洲。

天氣好凍，又冇朋友喺嗰邊，連附近嘅餐廳都冇開。

唯有匿喺酒店房度，對住個杯麵講Merry X’mas。

今年，難得有機會喺香港，衫褲鞋襪都買好晒，點知竟然喺屋企過咗一個冇聖誕嘅聖誕。

順利成章，買落嘅嘢就過渡去農曆新年。

可能，我條命係咁㗎啦，總係冇得過一個開心嘅聖誕。

無論身邊有冇人，最終都係無聲無息咁過。

嚟緊嘅除夕夜，我又要返工啦。

如果，嗰晚你喺飛機上，有位空姐派餐俾你嘅時候，同你講Happy New Year，你對佢笑一笑啦。

因為，佢原本係好想留喺香港倒數㗎。

當明天有約會時

自四、五年前長時間用了不適合的護髮用品，再加上當空姐後經常紮髻，我的頭髮由掃把般厚變得異常稀薄。

為了拯救垂死的頭髮，上班時任由baby hair彈出來也不肯多用定型spray，過千元的洗髮水+護髮素，付錢時面不改容。

兩年前開始，索性全部改用有機產品，買到肉赤但依然效忠Florame，就算每隔數月轉一轉品牌，也最緊要有機。

但這些有機品牌，都有一個共同之處，就是護髮素總不會令頭髮怎麼順滑，打結是必然的。

我電了微曲髮，擦乾頭髮後費功夫梳順再吹熱風，出來的效果總不及用護髮素時一併梳順的那樣好看。

平常是ok的，但到了第二天有約會時，就很有問題了。

我常穿得像落街食茶記然後返上樓的樣子去約會，但很介意頂著個柒頭見男人﹗

那即是說，之前一晚要另外用讓頭髮順滑但抖到氣的護髮素。

這是近期新寵：

From for blog

Pantene CLINICARE 速效髮根修護系列潤髮乳 （＄35.9/250ml)

最喜歡用完它之後，頭髮還是輕飄飄的，頭頂看起來豐盈健康些，沒平常那麼扁，顯得臉型也小一點。

這次，不用叫PR姐姐還番d頭髮俾我啦：）

Lady First 專欄（69）－ 等待愛情

好多嘢可以用錢解決到，好多事可以憑努力去成就出嚟，但係，愛情係唯一嘅例外。

錢買佢唔到，努力亦唔係大晒，愛情唔肯現身，你做咩都冇用。

除咗求上天跌一位愛人俾自己，仲可以做啲咩呢？

只有等待，唯有等待。

同時，自愛自重，冇愛人愛自己，就自己提醒自己，天氣轉涼要加件外套，得閒飲多杯橙汁吸收維他命C預防感冒。

當愛情終於跑上門嚟搵你，唔係話要誇張到著住晚禮服去迎賓，甚至，嗰刻你可能仲著緊睡衣煮緊公仔麵，只需要用笑容去話俾愛情聽你已經ready，咁就足夠。

記得最唔開心嘅時候，問過朋友，點解我永遠都係遇上錯先生。

朋友話我每次都係急急腳跳海逃生，然後喺三分鐘內搵個水泡或者浮板攬住，根本冇俾過機會自己學游水，亦都冇欣賞過眼前嘅海景，所以，最終都係錯愛。

對住一個太有好感嘅人，學會忍耐係好困難㗎，尤其喺香港呢個地方，浪漫似乎係百年難得一遇。

但經驗話俾我聽，浪漫過後，通常都係得返個桔，同埋眼淚。

靜心等待，總好過俾人糟蹋愛情，你話係咪丫？







很想輕撫你　所以避開你
寧願用距離　去令你好奇
迴避過眼神　先偷偷喘氣
吩咐手臂　放在原地

情太過洶湧像深海　而我卻會忍耐
但求來日你醒過來 這份情像翅膀打開

還沒有相戀別意外　神教會我等待

能為愛戀學習按奈　情信寄進心內
但求能學會倚靠神 愛被馴服過更精采

My Dream Date with 空姐Elaine (updated news)

----------------------------------------------------------------

Hi Elaine,

Just a quick update... so far, I have received quite a number of entries for My Dream Date Contest.

I will be meeting them for a chat and give you more information after the meet up.

Regards,
Cynthia

----------------------------------------------------------------

"quite a number of entries" 會唔會即係得三個丫？

真係好驚。

甚至開始驚到諗緊係咪要搵定d前度男友sssss撐場扮又想重新識過我。

然後發現，同我仲有聯絡既前度男友sssss，全體occupied﹗

十個灰。

唯有再推推：

http://www.lunchactually.com/dreamdate/

結左婚果d唔好報名唔該 -__-

好生活

零下四度的晚上，

躲在酒店房間享受泡泡浴，

背景音樂是Nat King Cole的The Christmas Song，

用最慵懶的姿勢揭著雜誌，

偶爾喝一口那杯放在浴缸邊的Moscato，

好生活，

本該如此。

是日金句

R：「下星期三book咗場打tennis啦。」

E：「哦。」

R：「咁我地約時間去買球拍啦。」

E：「唔使啦，問P借啦，佢有。」

R：「球拍都唔買你點學呀？」

E：「打tennis嘅重點唔係塊球拍，係網球裙。」

Lady First 專欄（68）－ 不是最愛

每次聽到有人講，佢嘅前度係佢嘅一生最愛，我都會擰擰頭，冇辦法表示認同。

未到死嘅一刻，我哋點樣肯定嗰個人就係最愛？

可能瞓醒一覺，就會發現自己唔係真係咁愛呢個人，又或者，第二日你會遇上另一個令你心動嘅人。

無論幾愛，最終都會變會淡會輕，往事始終都會如煙。

我情願直認自私自利，最愛嘅係我自己。

最近，我有個朋友準備搬返嚟香港住，我哋喺msn交換近況，我循例問佢返香港做咩工丫，搵咗地方住未丫，佢又問吓我身體情況點呀，返工忙唔忙呀… …

佢又提到會喺星期六早機返到香港，我就客氣一番話「幾好喎，你要搬咁多嘢返香港，weekend嘅話，屋企人可以嚟幫你手拎嘢。」

佢就答我：「我仲記得嗰日係你嘅生日。」

我望住電腦嘅screen，唔知講咩好，最後，冇講再見就offline。

我唔係詞窮，而係嗰刻，忽然間想起，原來自己根本唔記得佢幾時生日，甚至，連佢嘅姓氏都記唔起。

我記得曾經同呢個人相愛又分開，我寫過一封又一封嘅情信俾佢，佢曾經送過戒指俾我。

仲有一啲小片段，例如我哋一齊睇過日出，佢煮飯我洗碗，手拖手散步，佢等我放工等到唔耐煩發脾氣，我唔高興佢時時話我幼稚… …

同所有嘅情侶一樣，關係經過高低起伏最後分開，做嘅嘢唔算特別，亦有時溫馨。

但竟然，我連佢嘅姓氏都唔記得。

明明呢個人，我曾經好愛好愛，為佢喊咗好耐好耐。

Lady First 專欄 (67) － 尋找有帽長身衛衣的故事

話說，有個住喺銅鑼灣嘅女仔，佢每日下晝瞓醒覺，都係T恤短褲踢拖素顏咁落街食「早餐」，有時去Sogo附近嘅義順，有時去Times square嘅千兩，有時去希慎道嘅Starbucks。

佢知道自己一身打扮同街上嘅其他潮童、型人好唔match，甚至連佢身邊嘅朋友都睇唔過眼，問佢點解可以著得咁求其。

個女仔一臉唔在乎咁答：「你係出嚟行街，我係落樓下行街咋喎，想點啫？」

秋去冬來，個女仔嘅T恤短褲終於要收埋啦，佢見街上好多女仔都係著有帽長身衛衣，加七彩絲襪同毛毛boots，佢心諗… … 「咦… … 自己加條leggings同平底鞋咪落得樓囉，幾方便喎。」

於是乎，佢就喺銅鑼灣展開咗呢個尋找有帽長身衛衣之旅啦。

第一站，佢去咗Uniqlo，冇。

第二站，佢去咗Muji，冇。

第三站，佢去咗Zara，都係冇。

把心一橫，佢去埋Moussy，嘩﹗賣$590﹗食咗人隻車咩﹗

佢跟手去埋D-mop，賣$950﹗成千蚊一件衛衣？傻咗呀？

第二日，佢唔心息，又出去搵過，Bread & Butter有呀，賣$695，Peach John都有，不過係plain colour，仲plain過睡衣，賣$3XX。

佢忍唔住打電話俾朋友，問：「到底宜家係我賺得太少，定係啲衫賣得太貴？」

朋友答佢：「我都問緊自己。」

買唔成衫，不過呢個女仔睇中咗對鞋丫，係一對四吋黑色圓頭嘅Louboutin，$5190之嘛，唉。

Lady First 專欄 (66) － 希望之船

你可相信「一切皆是命，半點不由人」？

還是相信《秘密》一書裡頭所講的「吸引力法則」？

「吸引力法則」—— 當你打從心底期盼某些事，只要努力，只要保持正面的態度，而非只表達「我唔想要呢樣、唔想要嗰樣」的負面訊息，宇宙力量就會引導你，吸引你想要的物事來到身邊，令日夜期盼的一切成真。

無論信命或信自己，如果眼前有一個機會，讓你得到想要的一切，你可有膽量去試？

終於看了電影《賭博默示錄》，電影講述男主角是個漫無目的渾噩過日的「廢柴」，永遠心存僥倖，希望有日一票獨中大筆彩金，靚女自動送上門，揸benz住大屋，但現實是，他一事無成，最叻是伸別人的G55 AMG靚車一腳。

終於，他踏上一艘名叫「希望之船」的賭船，參加神秘賭局，只要贏出，就可還清欠款，餘款袋袋平安。

理所當然，他輸了，被押去不見天日的地底城當苦工。

後來，他有又一次機會，只要在五十樓高行過一條平衡木，成功由一棟大廈走過另一棟，便可以重獲自由及金錢。

如果你就是這樣一個一無是處，一事無成的人，又醜樣又沒學歷又不上進但又奢想有白馬王子打救，眼前是個機會啦。

只要你夠運，平平安安走過對面，即能擁有一切，靚過李嘉欣住半山揸Masarati有事業吳彥祖向你求婚，試唔試丫？

不過，衰咗的話，要死的。

小小通告

由這星期開始，我在蘋果日報的專欄將改為逢星期一刊登。

多謝支持 :)