Lady First 專欄（70）－ 今年聖誕

今年嘅聖誕，你係點過嘅呢？

同朋友開house party，玩到整跌晒人哋棵聖誕樹上面嘅裝飾？

同情人二人世界煮飯仔整聖誕大餐？

去咗蒲，轉場又轉場，希望會遇上一個令你心動嘅人，下年有得收佢送俾你嘅聖誕禮物？

定係你同我一樣，預備好所有嘢，但最後邊度都冇去，坐喺屋企睇咗成晚電視，之後著到爛身爛世咁落街，食咗同聖誕完全無關嘅一餐？

平安夜，我食咗一碗$6嘅白粥。

呢個故事同所有故事一樣，俾咗一啲教訓我，就係——「期望越大，失望越大」。

其實，有好幾年嘅聖誕，都冇喺香港過啦。

記得舊年嘅聖誕，我喺歐洲。

天氣好凍，又冇朋友喺嗰邊，連附近嘅餐廳都冇開。

唯有匿喺酒店房度，對住個杯麵講Merry X’mas。

今年，難得有機會喺香港，衫褲鞋襪都買好晒，點知竟然喺屋企過咗一個冇聖誕嘅聖誕。

順利成章，買落嘅嘢就過渡去農曆新年。

可能，我條命係咁㗎啦，總係冇得過一個開心嘅聖誕。

無論身邊有冇人，最終都係無聲無息咁過。

嚟緊嘅除夕夜，我又要返工啦。

如果，嗰晚你喺飛機上，有位空姐派餐俾你嘅時候，同你講Happy New Year，你對佢笑一笑啦。

因為，佢原本係好想留喺香港倒數㗎。