Lady First 專欄（63）－ 後悔

點解，上帝創造人嘅時候，要創造埋七情六慾俾我哋呢？又或者，點解唔創造一個只識開心快樂，唔識傷心失望嘅人類出嚟呢？

如果係咁，個世界會唔會變得比宜家美好？我哋嘅日子又會唔會比宜家過得更好？

喺咁多種情緒裡面，我最唔鍾意嘅一種就係 —— 「後悔」。

後悔嗰種感覺真係好差，就好似企喺餅櫃前面心大心細，本來想食New York Cheese Cake，但係Blueberry Cheese Cake個樣又好靚咁，結果，你將胃裡面呢個甜品嘅quota留咗俾後者。

點知，啲藍莓好酸，而你係最憎食酸嘢嘅，心裡面諗：「哎呀﹗早知就唔好揀來揀去，要返New York Cheese Cake咪好囉」。

係囉，有早知，冇乞衣。

個心又唔忿氣，又忟憎，又嬲自己，但係，已經好難返轉頭，唔通拎件食過兩啖嘅蛋糕返去餅店退貨？

你同自己講：「下一次，下一次我唔會再三心兩意，一定會揀返佢」。

但係，呢次，你揀咗Blueberry Cheese Cake嘅錯，係入咗血肉裡面，成為身體嘅一部分，搣唔甩啦。

況且，唔係每樣嘢都有下一次。

我好鍾意食一間叫Glace嘅餅店嘅蛋糕，但佢已經執咗好幾年。