我是最漂亮的X'mas Cake

各位關心我的朋友：

心情其實已平伏下來，當然，有時候會泛起漣漪。

經過那樣的奇遇，經過那樣透徹的指點，把我的往事我的私密一幕幕打開，才明白有些事情的確不應勉強，也用不著認真。

在25歲生日前，我的時間都會拿來作樂，多點消遣。

認真的話，一切是只會是「劫」。

昨夜睡得不好，不停的在想，像快速搜畫那樣，回想過去數月發生的事。

我的眼淚是否都白流了呢？我不知道。

為了愛我的人，為了不愛我的人，已經哭得太多。

甚至懷疑，是否連下一生的眼淚也預繳了。

翻看《紅樓夢》，在第一回中，絳珠仙子以一生所有的眼淚償還神瑛侍者的甘露之惠。

我的前生，大概不會是仙子。

然而，我願意相信前生虧欠了別人，致使今生用眼淚來償還。

債項已經還清，將眼淚留給心愛的電影音樂戲劇書本好了。

應承你們，我會努力我會自愛。

雖然，我大有可能成為一個無人問津的X'mas Cake。

但會成為賣相最漂亮，味道最甜美的一個。

我不會再讓眼淚溶化身上的糖霜。
Elaine

地鐵非禮記

基本上，o係擠迫既地鐵車廂內，被人摸pat pat掃大脾擦胸邊都係一般女生「司空見慣」既事。

今日，我又領教左一種新奇既非禮手法。

話說我握住地鐵車廂中央既扶手較低位置，一名男子同時亦都握住扶手，慢慢將佢既下半身貼近我握住扶手既玉手，後來更貼到「實一實」，問題係.... .... o個時車廂根本一D都唔迫！

更精彩既係，我既玉手完全可以感覺到佢有生理反應。

我想縮手但隻手已經被他貼實動彈不得。

你個粉人呀，你當我小玲個樣小家碧玉就好好恰呀！

作為一個異常燥底既潑婦，我係冇開口剷佢既，我只係出盡奶力將我把長遮插落佢隻腳度，跟住扮扣番好把遮粒鈕，再將把遮尾插落佢祠堂，佢痛到成個彈開兼縮埋一舊，我即時扮到好驚咁講左兩次對唔住。

落車既時候，我好感慨，因為我真係覺得自己... ...

係一個好可愛既小家碧玉，

係一個好人。

星期日檔案

一邊看一邊在哭，直哭了30分鐘。

是呀，我就是一個這樣眼淺的人。

我想， 阿咩一定上了天堂， 她看到地上還有這麼多人掛念自己， 她會安心會掛上一個最爽朗的笑容。

怎麼好人的苦難總是特別多？

假如世上多幾個像阿咩的女孩子， 大概天空也會藍一點。

痛到想死

因為落雨，所以我著左一對涼鞋，諗住濕左都快D乾呀，點知，就為我帶黎一個極之悲慘的教訓。

話說落雨落到狗屎咁既朝早十點幾，我如常返工，o係出lift既時候，濕淋淋既地板令我腳底一滑，好一隻右腳腳指公踢左埋lift門邊，半隻腳甲90度角咁反起左~~~~

結果，俾個醫生o係我隻腳指公打左3支麻醉針，再用刀同我批左塊腳甲去，跟手再o係我pat pat打多枝消炎針。

當時我淒厲既叫聲同喊聲，令我既3個男同事簡直以為我o係度生緊仔。

除左用個「痛」字，我唔知仲可以用咩字黎表達我既感受。

頂~~~ 原本今晚有朋友同我去SoHo Latata食餐好架ma

頂~~~ 我o係i.t.新買既ballet shoes幾時先可以落地呀

頂~~~ 我o係Lane Crawford hold左果幾對鞋點算呀

頂~~~ 我冇男人冇令我開心既鞋著冇得出街同朋友食飯冇得做運動我會想死架喎


咁我係咪死得啦？

I can't stop my tears

我討厭下雨天。

每次看到雨絲，看到雨點打在玻璃窗上，總會莫名其妙的想哭。

中午時獨自一人在辦公室吃午餐，看著窗外灰暗的天，忽爾整顆心都好像掉落了，覺得好寂寞好寂寞。

然後聽到滴嗒滴嗒的聲音，我以為是一雙手按著鍵盤的聲音，原來是眼淚一滴滴落在淺灰的辦公桌上。

我很努力的叫自己不要哭，至少不應該在辦公室哭，但眼淚沒有理會我。

一小時的午膳時間，用了超過三十分鐘來哭，在同事回來之前，狠狠的用紙巾，用力將眼淚擦乾。

感謝父母

爸媽去了旅行一星期，我已領會到平日的我有多幸福。

我的衣著並不是非黑即白的簡約，當媽媽在身邊，只要將穿過的衣服拋進污衣籃，她自會懂得替我處理。

這幾天下班回到家中，已累得賊死。

懶理那些衣服是雪紡釘珠繡花還是麻質，通通放入洗衣機作罷。

更痛苦的是，那些衣服是不會自己從洗衣機跳出再爬到衣架上的。

現在，我看著面前一件新買的該用手洗的深綠拼白喱士吊帶背心， 真有點想死的感覺。

數天前陪伴友人去改褲，友人身量較我高，但穿的褲長卻比我短，令我不明所以。

後來才知道身高僅得5呎1的我，腿長也有39.5吋。

今天在Miss Sixty試穿牛仔裙的時候，真的覺得要感謝父母。

要不是一雙腿救了我，憑著這樣的小矮人身段，單是買衣服已可寫出一段血淚史。

我的願望

有一個人，

陪我在有微風有星星的寧靜地方，

聽我說點點心事，

借出肩膀讓我靠著，

好好哭一會。


從小只慣聆聽別人心事，後來更成為工作的一部份。

及至自己出了軌，放肆任性一如小孩，在人前流露心事時已發現不懂表達，淡淡的像在說別人的事。

雖然得到友人支持鍾愛，但其實已吃足苦頭傷透了心。

如今再世為人，那些曾經，都是看不見的滄海桑田。

詭異

友人們總是覺得，我的文字像是絞出眼淚，但面對面談天時，明明說著最心酸的事，我還是嘴角帶笑，甚至不忘說上一兩個笑話嘲笑自身。

友人們只覺太詭異，禁不住問我是裝作開心，還是開始精神分裂。

如果溫柔一點，看起來不是那樣強悍，大概，會找到那個人吧。

可惜，我從來不像依人的小鳥。

看著自身逐漸淪落逐漸枯萎，看著一顆心漸漸麻木慢慢死去。

那種感覺， 是說不出的難受。

流浪的失眠人

我有失眠的習慣。

已經有一段日子無法好好入睡。

但離開了家，只要是我覺得安心的地方，都可以掛上微笑沉睡。

公司車廂別人的床別人的沙發，便是我最好的安眠藥。

在老天真的家中，在淡黃的燈下，談天喝Bailey's看《設計私生活》聽王菀之， 然後在該是精神奕奕的時間，已在他的床上沉沉入睡。

半夢半醒時好像感到他替我除下眼鏡蓋上被輕掃我的劉海，醒來時看到他躺在我的身旁微笑對我說：「你應該讓一個好男人去對你好」。

老天真，是你應承了的啊！

在你的新屋子內，要有一間客房留著給我，讓我可以好好的睡一會。

最多，假若你有了一間甜品店以後，我做兼職侍應來報答你。

擁抱

我覺得有點冷，

好想要一個擁抱。

有人可以給我一個擁抱嗎？

要不然，

賣給我亦可。

但可否不要吻下來，

可否不要將我抱到床上？

我想要的，

只是一個單純的擁抱。

我的化妝流程

1. 帶con

2. Shu Uemura Eyebrow Pencil

3. Jurlique Herbal Recovery Gel

4. Smash Box Anti Shine

5. Smash Box Photo Finish / Shu Uemura UV Under Base

6. Smash Box Backdrop Cooling Tint / Shu Uemura Water Perfect Foundation

7. Laura Mercier Secret Concealer

8. Bourjois Blush / Benefit Benetint

9. Shiseido The Make Up Powdery Foundation / Covermark Loose Powder

10. Smash Box Eye and Lid Primer

11. Nars Eyeshadow

12. Shiseido The Make Up Eyeliner Pencil Duo

13. Lancome Flex WP Mascara

14. Shu Uemura Lip Serum

15. Stephane Marais Lipstick

16. Laura Mercier Secret Finish


其實我想說的是，

天天將這15樣化妝品塗在臉上然後外出笙歌作樂，

是很腌悶的一回事。

無聊問答

01. 你中文名好唔好聽？死都話好。因為我既中文名，就係父母第一份送俾我既禮物。

02. 你英文名係邊個同你改？自己

03. 你現在的手提號碼用左幾耐？好多年啦

04. 想唔想轉號碼？嫁人之後我會轉。我唔想o係餵奶洗衫煮飯幫老公?拖鞋時聽到我愛過或愛過我既人既聲音。太盪氣迴腸啦，一個師奶仔應該安份守己。

05. 幾耐換一次電話？個電話氣絕身亡就換

06. 用緊咩電話繩？冇。你話買條A.P.C好定Gucci好？其實，我唔鍾意用電話繩。

07. 有冇打耳洞？有，每邊一個。

08. 有冇留指甲？雙手太小，留指甲反而老氣。一雙手係用黎工作既，修飾得太過精緻花巧，就會唔想做野。咁樣好危險。

09. 鍾唔鍾意自己個髮型？已經係我能力範圍(手藝+金錢)之內最好既。整三千蚊一個頭冇問題，但係行出salon之後，有冇能力維持到個髮型先係問題。何必呢？

10. 多唔多化妝？去dating dining shopping gathering時會化，你話多唔多？

11. 有冇戴眼鏡？化妝時戴con，返工時戴Dior。

12. 出街有咩一定要帶？八達通、信用卡、電話、粉盒、唇膏。

13. 有咩最近唔見左之後好唔開心？唔見左自己

14. 最近收到咩禮物？薰衣草種子

15. 最近高興的事？下巴尖左，條腰幼左。

16. 最近難過的事？唔想提。再難過，始終會過。

17. 有冇d咩係好想要但係又冇錢買？老公一個

18. 有d咩你認為係有錢都買唔到？愛情

19. 你初吻俾左邊個？大件事... ... 完全冇印象。

20. 會唔會一腳踏兩船？never say never

21. 你會唔會搶人地個男朋友？唔會。但... ...what is the definition of 「搶」？

22. 有冇邊一段情係你好想返轉頭？有。但係唔代表可以，亦唔代表應該。即使返轉頭，佢未必會係那年那月那日既佢，而自己亦已經面目全非。情願將o個段愛情既餘溫，好好咁收o係心房，陪伴心跳。

23. 咁你仲有冇同佢聯絡？我唔係一個涼薄既人

24. 你地依家又係咩關係？舊情人是個做到最好偏錯失的結局... ...

25. 有咩令你對佢留下深刻印象？因為曾經深愛過

26. 你最鍾意邊個國家？有父母朋友愛人o係身邊既國家

27. 最鍾意邊個節日？只要過得開心，每日都值得慶祝。

28. 希望同邊類型的伴侶結婚？我愛佢佢愛我、簡簡單單、開開心心、我願意為佢一生一世做黃面婆既男人。

29. 你會在幾多歲才考慮結婚問題？由15歲開始

30. 想跟什麼年紀的人結婚？年紀，一D都唔重要。只要我愛佢，我唔會理佢大我十年、二十年、三十年定四十年。

31. 婚後想要多少個孩子？一個都唔要又得，生一打都得。

32. 買得最貴的一件衫大約幾錢？我唔鍾意買貴衫。我擁有最珍貴既一件衫，係媽媽既婚紗。

33. 最近喜歡聽o既歌係邊首？守望杜田

34. 最近追的劇集是什麼？靚太唔易做

35. 現在最想見到的人？會令我笑既人

36. 最近睇過邊套電影？抹茶之戀味

37. 對上一次同邊個拖過手？我既蘇眉

38. 對上一張合照係同邊個影架？我既蘇眉

39. 隱形一個鐘你會做d咩？去見我想見但唔敢見既人

40. 現在你最憎的人是誰？我從來不恨任何人

41. 一生中最後悔的事係乜？冇俾心機讀書

42. 第一個向你示愛的異性是誰？真真真係唔記得

43. 有冇收過花？有

44. 送過花俾人未？有

45. 咁送花俾邊個？?，你問咩呀？我聽唔清楚呀。

46. 有咩理想？結婚生子

47. 鍾意讀書定返工？讀書

48. 內向定外向？內向地外向

49. 你認為什麼才叫「愛」？愛是一個男人只能與你吃翠華魚蛋河但你天天吃著還是覺得湯底鮮甜魚蛋彈牙河粉滑溜。

50. 對上一次喊係因為咩事？因為傷心

51. 最近去過咩人屋企？太多，唔記得。

52. 手提電話內的Wallpaper是誰？岑岑眼中既我

53. 用緊邊首鈴聲？愛是不保留

54. 上次飲酒係幾時？朋友既朋友屋企，紅酒一杯。

55. 喜歡MSN還是ICQ？咪又係同一班人，根本無分別。