星期三, 1月 13, 2010

又一次修身

又又又開始減肥啦。

到底,要減幾多次肥先可以修成正果呢?

唔通,要減到死嗰日?

死咗之後,我嘅肉身經過火燒,會唔會有舍利子出現?

全部係生前食嘅減肥藥精鍊出嚟?

女仔要減肥,真係好麻煩。

跑步怕腳粗,游水怕變平胸,做gym又驚成個人橫咗。

諗來諗去,食藥做機好似好懶,但反而係最safe嘅。

減肥難,唔減咁又點呢?

我只係覺得,一個肥嘅女仔,佢條路,往往比其他女仔難行得多。

女仔一肥,就係「豬扒」。

即使你個樣其實幾靚,人聰明心地又好,放心,冇人會睇得到,你依然係一件「豬扒」。

上個禮拜,阿媽語重心長咁問我:「你就快三十歲啦,想玩到幾時呀?」

當然,佢指嘅係 —— 我幾時會選擇安定落嚟,結次婚生個孫俾佢玩。

但我諗起嘅係,就快三十歲啦,幾時可以100%修身成功,唔好再去到90%就停低,然後退步返去80%。

係時候將肥咗嘅幾磅肉減走,搵番嗰個好有毅力,減到日日胃抽筋都唔肯停嘅自己。

十個女仔,九個都話要減肥,為咗男人又好,為咗自己都好,建立一個目標,推動自己進步向前,始終係一件好事嚟嘅。

雖然,我阿媽仍然係未望到家鄉,未見到自己個女結婚生仔,冇法啦。


7 則留言:

  1. 其實時代唔同,
    肥瘦嘅標準都唔同!
    最緊要係心理及生理健康!
    其實妳都唔算肥....
    唔好浪費啲冤枉錢減肥,
    係時侯要儲番啲錢喇!

    回覆刪除
  2. 頂﹐我話減都成大半年﹐好似只係減兩﹑三磅。但我而家每日(返工日)會行40分鐘度啦。希望長時間下會減多D。但我覺得﹐始終都係要做返D toning 既運動。經你咁講﹐真係又要重新來過啦!!

    回覆刪除
  3. 每次睇你既文章都會笑. ^^
    跑步係帶氧運動無理由會跑粗隻腳. 只要唔好過量就得.
    男仔唔想要豬扒, 但亦都唔會想要一件排骨.

    回覆刪除
  4. Get married and have a baby, I am sure u can be as slim as you wish.

    Your husband will make you mad and your baby will make you crazy.. that's how I become lighter and lighter these 5 years after getting married.

    回覆刪除
  5. 當你俾人日日話肥矮蠢既時候,你會諗係咪自己有問題。但我始終讚成你所講,“為咗自己,建立一個目標,推動自己進步向前,始終係一件好事嚟嘅。”就覺得我應該放棄那個人。

    回覆刪除
  6. 唔通,要減到死嗰日? yes


    死咗之後,我嘅肉身經過火燒,會唔會有舍利子出現?U? don't think so.


    全部係生前食嘅減肥藥精鍊出嚟?see the above


    女仔要減肥,真係好麻煩。女仔=麻煩;減肥女仔=真係好麻煩


    跑步怕腳粗,游水怕變平胸,做gym又驚成個人橫咗。平胸跑步游水做gym 怕極都系平胸。


    諗來諗去,食藥做機好似好懶,但反而係最safe嘅。食藥自殺快d


    減肥難,唔減咁又點呢?=肥


    我只係覺得,一個肥嘅女仔,佢條路,往往比其他女仔難行得多。白馬皇子抱住例外。


    女仔一肥,就係「豬扒」。豬扒唔系人咩?


    即使你個樣其實幾靚,人聰明心地又好,放心,冇人會睇得到,你依然係一件「豬扒」。半肥瘦豬扒其實好多人中意食。


    上個禮拜,阿媽語重心長咁問我:「你就快三十歲啦,想玩到幾時呀?」聽日
    ...........


    雖然,我阿媽仍然係未望到家鄉,未見到自己個女結婚生仔,冇法啦。有結婚就有機會離婚;都系為百有好姐。

    回覆刪除
  7. facebook張相小腿展現出嚟嘅線條美,好多女人恨都恨唔到。

    回覆刪除