「點解做空姐？」之伸延性問題「想做幾耐？」

承蒙公司對本人之厚愛，o係我半年port o左廿幾日 sick leave，CPP低無可低，因為表現失準態度輕佻私生活唔檢點既謠傳，一次又一次俾媽媽生召見既情況下，依然順利通過試用期，令一眾友人大跌眼鏡。

好啦！另一個問題o黎啦。朋友開始問：「你想做幾耐？」。一條俾人問o左不下於十次既問題，我個表情，依舊係過膠咁樣呆o左。我唔係詞窮，而係個腦根本一片空白。我唔係一個唔諗將來既人，但到o左宜家，我只係覺得，呢個世界，太多uncertainity。

曾幾何時，我以為自己一生一世做個好社工，將d邊青執返o黎，用愛去感化佢地。到最後，去clubbing時我望住鏡裡面既自己，決定以後唔會再帶張註冊社工證出街。

早兩晚食緊大閘蟹既時候，我又俾同學問我同一個問題。今次，我打算好好地問自己，到底我想做幾耐...

作為一個冇咩大志，盲字唔識多隻，學歷普通又討厭辦公室政治既女子，空姐似乎真係一份最適合我既職業。

1. 每個月起碼有15日假放。
2. 可以請好多病假。因為有病，真係唔可以返呢份工。
3. 放工就係放工，冇o野需要拎返屋企OT。
4. 返工可以唔帶腦。
5. 進行環球性shopping、dining、clubbing活動。
6. 無論個同事幾討厭，最多只需要對住佢30個鐘，然後永不相見。
7. 可以將日常生活頹廢靡爛，歸咎於工作性質同jet lag。
8. 人返工我行街，原來銅鑼灣係好闊好大既。
9. 身邊會突然多o左d男人，對我有fantasy。
10. 會變得靚o左，因為扮靚係職業需要。
.
.
.
.
.
.
.
.
.
其實，我最想做既... 係一個師奶。