Lady First 專欄（61）－ 當我想起你

尋晚，一個大好嘅星期日晚，我冇留喺屋企成日對住個電視咁浪費時間，黃昏就同朋友打扮妥當出咗去聽concert。

你以為我哋去紅館？當然唔係啦，我哋去捧朋友場，去文化中心音樂廳聽交響樂。

喺攞飛前嘅一刻，都唔知會聽啲咩交響樂，反正知都冇用，我根本就唔識。

當從朋友手中拎咗張ticket一望 —— 係馬勒嘅第八交響曲。

對古典音樂毫無認知毫無天份嘅我，其實，連第五同第八交響曲都未必分得清。

不過，我好肯定我聽過，因為第一次去文化中心音樂廳，就係同舊男友一齊去聽馬勒，呢個係佢嘅 all time favourite。

今次坐喺裡面，我冇再瞓著覺，而係利用呢兩個鐘，寫咗一篇稿同諗起好多往事。

事隔幾年，我老咗憔悴咗，塊面多咗啲細紋，智慧冇增長到，依然一聽到classical music就會恰眼瞓。

但係，總算on the right track，我哋都總算on the right track。

忽然之間，好想返屋企拎嗰隻馬勒嘅CD，再聽多一次。



“再記起一些古老的心事 

再記起心中一串開心的日子 

曾在那似遠遠的以前 

共你差不多天天都相見 

曾話過那天起 
你已屬我永不變 




過去的經已不會再出現 

遠去的一切只會更加遙遠 

明白到各有各的去路

但我心中始終感到 

曾共你愛過 暖暖的令我自豪”